ເມລາໂທນິນ – ຮໍໂມນເພື່ອການນອນຫລັບ

ເມລາໂທນິນ (Melatonin)
ເປັນຮໍໂມນຊະນິດຫນຶ່ງທີ່ຮ່າງກາຍສາມາດສ້າງຂຶ້ນເອງໄດ້ ມີບົດບາດຊ່ວຍຄວບຄຸມການນອນຫລັບຂອງຄົນ ຊ່ວຍໃຫ້ຄົນເຮົາມີວັດທະຈັກການນອນທີ່ດີ ເຊິ່ງຫາກຮໍໂມນດັ່ງກ່າວຫລຸດລົງກໍ່ຈະນຳໄປສູ່ບັນຫາໃນການນອນຫລັບໄດ້.

ເມລາໂທນິນເປັນຮໍໂມນທີ່ຖືກຜະລິດອອກມາຈາກຕ່ອມໄພນ້ຽວ (pineal) ເປັນຕ່ອມທີ່ຢູ່ບໍລິເວນກາງສະຫມອງມີຂະຫນາດເທົ່າເມັດຖົ່ວ, ກົນໄກການເຮັດວຽກຂອງຕ່ອມດັ່ງກ່າວຈະຂຶ້ນຢູ່ກັບແສງສະຫວ່າງ ແລະ ອຸນຫະພູມ. ດັ່ງນັ້ນ, ເມລາໂທນິນຈະຖືກຜະລິດຂຶ້ນໃນຂະນະທີ່ເຮົາຫລັບ ແຕ່ຖ້າຮ່າງກາຍເຮົາຢູ່ແສງແຈດຕະຫລອດເວລາ ຂະບວນການຜະລິດເມລາໂທນິນຈະຢຸດທັນທີ ແລະ ເຊັ່ນດຽວກັນເມື່ອມີອາຍຸຫລາຍຂຶ້ນ ລະດັບເມລາໂທນິນກໍ່ຈະຫລຸດຫນ້ອຍຖອຍລົງໄປເລື້ອຍໆເຊັ່ນດຽວກັນ.

ຄຸນປະໂຫຍດຂອງເມລາໂທນິນ
ຮໍໂມນຊະນິດນີ້ມີປະໂຫຍດຫລາຍຫາກເຮົາໄດ້ເພີ່ມຈາກອາຫານເສີມນອກເຫນືອໄປຈາກທີ່ຮ່າງກາຍ
ເຮົາຜະລິດຂຶ້ນເອງ.

1. ຊ່ວຍເຮັດໃຫ້ເຮົາຮູ້ສຶກຢາກນອນ, ຜ່ອນຄາຍ, ນອນຫລັບແຈບຕະຫລອດຄືນ, ຫລັບສະບາຍ ແລະ ຕື່ນມາຢ່າງແຈ່ມໃສ. ແພດບາງຄົນຈຶ່ງໃຊ້ເມລາໂທນິນກັບຄົນປ່ວຍທີ່ເປັນພະຍາດນອນບໍ່ຫລັບແທນການໃຊ້ຢານອນຫລັບນັ້ນເອງ.
2. ເປັນສານຕ້ານອະນຸມູນອິດສະຫລະທີ່ຊົງພະລັງ ສາມາດຕ້ານຄວາມຊະລາໄດ້ເປັນຢ່າງດີ.
3. ສ້າງລະບົບພູມຄຸ້ມກັນ.
4. ຊ່ວຍແກ້ພະຍາດຊຶມເສົ້າ.
5. ການວິໄຈຍັງພົບວ່າເມລາໂທນິນສາມາດຊ່ວຍໃນການຄວບຄຸມນໍ້າຫນັກໄດ້ ເຖິງວ່າຈະບໍ່ໄດ້ຫລຸດອາຫານລົງກໍ່ຕາມ.
6. ຊ່ວຍຄວບຄຸມລະດັບໄຂມັນໃນເລືອດ.

ປັດໃຈພາຍນອກທີ່ຈະຊ່ວຍໃຫ້ເຮົານອນຫລັບໄດ້ດີຂຶ້ນ
ກ່ອນນອນໃຫ້ລີ່ໄຟທັງຫມົດຢູ່ໃນບ້ານລົງ, ຫລີກລ້ຽງການເບິ່ງໂທລະທັດ ແລະ ໃຊ້ຄອມພິວເຕີ ຫລື ໂທລະສັບມືຖື. ແສງໄຟເຫລົ່ານີ້ສາມາດຫລຸດຜ່ອນການຜະລິດຂອງເມລາໂທນິນ ເຮັດໃຫ້ເຮົານອນຫລັບຍາກໄດ້.

ອີກວິທີຫນຶ່ງແມ່ນຄວນຖືກແສງແດດລະຫວ່າງມື້ໃຫ້ຫລາຍ ໂດຍສະເພາະແມ່ນຕອນເຊົ້າ. ປັດໃຈອື່ນໆທີ່ສາມາດຫລຸດລະດັບເມລາໂທນິນລົງໄດ້ກໍ່ແມ່ນ ຄວາມຕຶງຄຽດ ແລະ ການເຮັດວຽກກາງຄືນ.

ນອນດົນຊໍ່າໃດຈຶ່ງຈະພໍ
ຫລາຍໆຄົນຄຶດວ່າ ຄົນເຮົາຕ້ອງນອນໃຫ້ໄດ້ 8 ຊົ່ວໂມງຖຶງຈະພຽງພໍ ແຕ່ທີ່ຈິງແລ້ວຕົວເລກ 8 ຊົ່ວໂມງ ເປັນຄ່າສະເລ່ຍເທົ່ານັ້ນ ການນອນໃຫ້ພຽງພໍຄືການນອນຈົນຮູ້ສຶກໂຕຕື່ນຂຶ້ນມາເອງ ແລະ ສາມາດຢູ່ໄດ້ໂດຍບໍ່ເມື່ອຍເພຍຫມົດມື້.

ບັນຫາການນອນບໍ່ຫລັບຈະສົ່ງຜົນກະທົບຫຍັງແດ່?
ເມລາໂທນິນເຮັດຫນ້າທີ່ຄວບຄຸມການນອນຂອງມະນຸດໂດຍສະເພາະ ການນອນບໍ່ຫລັບສາມາດສົ່ງຜົນກະທົບຕໍ່ລະດັບພະລັງງານ ແລະ ອາລົມໄດ້, ຜູ້ທີ່ມີບັນຫາສຸຂະພາບມີພະຍາດປະຈຳຕົວຢູ່ແລ້ວ ກໍ່ຈະຍິ່ງເພີ່ມຄວາມສ່ຽງຫລາຍຂຶ້ນ.

ປະລິມານການຮັບປະທານເມລາໂທນິນ
ຂະຫນາດຂອງເມລາໂທນິນໃນຮູບແບບອາຫານເສີມແມ່ນມີຕັ້ງແຕ່ 1 mg ຫາ 10 mg ປະລິມານການໃຊ້ຄວນເລີ້ມຈາກຫນ້ອຍໄປຫາຫລາຍເຊັ່ນ: ເລີ້ມຈາກ 1 mg ຫລື 3 mg ເປັນຕົ້ນ.

ພິມຫນ້ານີ້