ກອງກຳລັງຕິດອາວຸດປະຈຳລຳໄສ້

ໂພຣໄບໂອຕິກ (Probiotic)

ໂພຣໄບໂອຕິກແມ່ນແບັກທີເຣຍທີ່ມີຊີວິດ ແລະ ເປັນແບັກທີເຣຍທີ່ໄດ້ຮັບການຄັດເລືອກແລ້ວວ່າເປັນຊະນິດສາຍພັນທີ່ມີປະໂຫຍດຕໍ່ຮ່າງກາຍ ຫລັງຈາກທີ່ເຮົາຮັບປະທານເຂົ້າໄປມັນຈະໄປອາໄສຢູ່ລຳໄສ້ໃຫຍ່ ແລະ ຂະຫຍາຍພັນໃນລຳໄສ້ຂອງເຮົາ. ໂດຍພວກນີ້ມັນຈະໄປຊ່ວຍປັບສົມດຸນຂອງແບັກທີເຣຍທີ່ອາໄສຢູ່ແຕ່ເດີມໃນລຳໄສ້ຂອງເຮົາ ເຮັດໃຫ້ແບັກທີເຣຍທີ່ດີມີຈຳນວນຫລາຍຂຶ້ນ ແລະ ແບັກທີເຣຍບໍ່ດີມີປະລິມານຫລຸດລົງ. ຕ້ອງບອກກ່ອນວ່າ ແບັກທີເຣຍບໍ່ດີຄືແບັກທີເຣຍທີ່ຈະເຮັດໃຫ້ທ້ອງຂອງເຮົາອືດ, ເຈັບທ້ອງ ແລະ ສ້າງສານກໍ່ພະຍາດມະເຮັງ ສ້າງສານທີ່ມີກິ່ນເຫມັນ. ດັ່ງນັ້ນ, ໂພຣໄບໂອຕິກຈະເຮັດໃຫ້ສຸຂະພາບລຳໄສ້ດີຂຶ້ນນຳອີກ ແຕ່ກໍ່ຂຶ້ນຢູ່ກັບສາຍພັນນັ້ນໆໃນລຳໄສ້ຂອງເຮົາ. ສະຫລຸບກ່າວຄື ໂພຣໄບໂອຕິກຈະຊ່ວຍໃຫ້ສຸຂະພາບທ້ອງໄສ້ຂອງເຮົາດີຂຶ້ນກວ່າເດີມນັ້ນເອງ.

ໂພຣໄບໂອຕິກມີຢູ່ໃນອາຫານຫລາຍປະເພດ ແຕ່ເປັນທີ່ຮູ້ຈັກກັນດີຈະມີຢູ່ໃນຜະລິດຕະພັນນົມທີ່ມີລົດຊາດສົ້ມ ຫລື ອາຫານທີ່ຜ່ານການດອງບາງຊະນິດເຊັ່ນ: ນົມສົ້ມ, ໂຢເກີດ, ກິມຈິ ຫລື ສົ້ມຜັກ ແລະ ອື່ນໆ. ນອກຈາກນີ້, ໃນອາເມລິກາຍັງນິຍົມໃຊ້ໂພຣໄບໂອຕິກຊະນິດ ແລັກໂຕບາຊິລລັສ (Lactobacillus) ເປັນສ່ວນປະສົມໃນອາຫານເສີມ ແລະ ຜະລິດຕະພັນຕ່າງໆ ເຊິ່ງມີຄວາມປອດໄພໃນການຮັບປະທານ.

ພີຣໄບໂອຕິກ (Prebiotic)

ພີຣໄບໂອຕິກຖືກຈັດເປັນຜະລິດຕະພັນອາຫານເພື່ອສຸຂະພາບ ເພາະມີປະໂຫຍດຕໍ່ສຸຂະພາບ ເປັນອາຫານຊຶ່ງຮ່າງກາຍມະນຸດບໍ່ສາມາດຍ່ອຍ ແລະ ບໍ່ຖືກດູດຊຶມໄດ້ໃນລະບົບທາງເດີນອາຫານ ທັງກະເພາະອາຫານ ແລະ ລຳໄສ້ອ່ອນ ແຕ່ຈະຖືກຍ່ອຍດ້ວຍແບັກທີເຣຍໂພຣໄບໂອຕິກບໍລິເວນລຳໄສ້ໃຫຍ່. ພີຣໄບໂອຕິກຈະກະຕຸ້ນການເຮັດວຽກ ແລະ ສົ່ງເສີມການຈະເລີນເຕີບໂຕຂອງແບັກທີເຣຍໂພຣໄບໂອຕິກ. ສະຫລຸບໂດຍຫຍໍ້ແມ່ນ ພີຣໄບໂອຕິກ ຈະເປັນອາຫານເພື່ອລ້ຽງໂພຣໄບໂອຕິກນັ້ນເອງ.

ພີຣໄບໂອຕິກສາມາດພົບໃນພືດຫລາຍຊະນິດເຊັ່ນ: ກະທຽມ, ຫອມຫົວໃຫຍ່່, ທັນຍາພືດ, ຫນໍ່ໄມ້ຝະລັ່ງ ແລະ ຫມາກໄມ້ເຊັ່ນ: ຫມາກກ້ວຍ, ແອັບເປີ້ນ ນອກຈາກນີ້ ເພິ່ນຍັງໃສ່ພີຣໄບໂອຕິກໃນຜະລິດຕະພັນອາຫານອີກຫລາຍປະເພດ.

ບົດສະຫລຸບ

ແບັກທີເຣຍໂພຣໄບໂອຕິກ ຕ້ອງການ ພີຣໄບໂອຕິກ ຈຳນວນຫລາຍ ຈຶ່ງຈະສາມາດຈະເລີນເຕີບໂຕໄດ້, ບັນຫາແມ່ນການໃຊ້ຊີວິດຂອງມະນຸດເຮົາ ແລະ ການຮັບປະທານອາຫານໃນປັດຈຸບັນໄດ້ປ່ຽນແປງໄປຈາກແຕ່ກ່ອນຫລາຍ ຈຶ່ງເຮັດໃຫ້ໄດ້ຮັບ ພີຣໄບໂອຕິກບໍ່ພຽງພໍ ທ້ອງໄສ້ເຮົາກໍ່ຍາກທີ່ຈະຕໍ່ສູ້ຕ້ານກັບແບັກທີເຣຍທີ່ບໍ່ດີ. ຊໍ້າບໍ່ຫນຳ ອາຫານບາງປະເພດທີ່ກິນເຂົ້າໄປເຮັດໃຫ້ເກີດຜົນທີ່ກົງກັນຂ້າມກັນ ຄືຍິ່ງໄປເພີ່ມແບັກທີເຣຍທີ່ບໍ່ດີໃຫ້ແກ່ລຳໄສ້ເປັນຕົ້ນແມ່ນ: ນໍ້າຕານ, ອາຫານປະເພດຈືນ, ອາຫານສຳເລັດຮູບ ເປັນຕົ້ນ. ສະນັ້ນ, ຕ້ອງພະຍາຍາມປຸງອາຫານດ້ວຍພືດ ແລະ ຫມາກໄມ້ທີ່ອຸດົມໄປດ້ວຍພີຣໄບໂອຕິກ.

ພິມຫນ້ານີ້