ຄຸນປະໂຫຍດຂອງຂີ້ຫມິ້ນຕໍ່ຜູ້ປ່ວຍໂລກປະດົງ ແລະ ຣູມາທອຍ

ມື້ນີ້ຈະມາແບ່ງປັນໃຫ້ແກ່ທ່ານຜູ້ອ່ານກ່ຽວກັບຄຸນປະໂຫຍດຂອງຂີ້ຫມິ້ນ. ຂີ້ຫມິ້ນ ຫລື ໃນພາສາອັງກິດເອີ້ນວ່າ: turmeric ເປັນພືດສະຫມຸນໄພພື້ນບ້ານທີ່ມີເນື້ອເປັນສີເຫລືອງທອງ ແລະ ມີກິ່ນຫອມອ່ອນໆ.

ຂີ້ຫມິ້ນເປັນທີ່ນິຍົມມັກນຳມາປຸງແຕ່ງອາຫານຄາວຫວານປະເພດຕ່າງໆມາດົນນານກວ່າ 5,000 ປີແລ້ວ ໂດຍສະເພາະໃນປະເທດອິນເດຍ, ຈີນ ແລະ ກໍ່ບ້ານເຮົາເຊັ່ນ: ໃຊ້ເປັນຜົງເຄື່ອງເທດເພື່ອເຮັດແກງກະຫລີ່ເປັນຕົ້ນ. ນອກຈາກນີ້, ໃນບຸນປະເພນີປີໃຫມ່ລາວ ພວກເຮົາຍັງເຫັນຜູ້ເຖົ້າຜູ້ແກ່ນຳຂີ້ຫມິ້ນມາຝົນໃສ່ນໍ້າຫົດສົງພະນຳອີກ.

ແຕ່ຮູ້ບໍ່ວ່າ ນອກຈາກຂີ້ຫມິ້ນຈະມີປະໂຫຍດໃນດ້ານການນຳມາເຮັດອາຫານແລ້ວ ຍັງອຸດົມໄປດ້ວຍວິຕາມິນ ແລະ ສານອາຫານຫລາກຫລາຍທີ່ມີປະໂຫຍດຕໍ່ຮ່າງກາຍ.

ໄດ້ມີການສຶກສາທາງການແພດກວ່າ 6,000 ກໍລະນີ ພິສູດວ່າຂີ້ຫມິ້ນເປັນຢາສະຫມຸນໄພພື້ນເມືອງຮັກສາໂລກອັນດັບຫນຶ່ງທີ່ມີໃນຍຸກປັດຈຸບັນ. ເຫດຜົນເປັນຫຍັງຂີ້ຫມິ້ນຈຶ່ງມີຄຸນປະໂຫຍດຫລາຍປານນີ້ ເນື່ອງຈາກມັນມີສານປະກອບທີ່ເອີ້ນວ່າ: ເຄີຄູມິນ (curcumin) ເຊິ່ງມີສັບພະຄຸນຕ້ານການອັກເສບເປັນຫລັກ. ມາເບິ່ງກັນເລີຍວ່າຍັງມີຄຸນປະໂຫຍດຫຍັງອີກແນ່:

1. ດັ່ງທີ່ກ່າວຂ້າງຕົ້ນ ຂີ້ຫມິ້ນມີສັບພະຄຸນຕ້ານການອັກເສບເຊິ່ງຈະຊ່ວຍບັນເທົາອາການເຈັບປວດໄດ້ເຊັ່ນ: ປວດຂໍ້ຊໍ້າເຮື້ອ, ໂລກໄຂຂໍ້ອັກເສບເຊັ່ນ: ປະດົງ ແລະ ຣູມາທອຍ, ປວດກ້າມຊີ້ນ, ເອັນ ແລະ ເນື້ອເຢື່ອອ່ອນ.

2. ຊ່ວຍໃນເລື້ອງນໍ້າຕານໃນເລືອດ: ຖ້າມີບັນຫາກ່ຽວກັບໂລກເບົາຫວານ ຫລື ລະດັບພະລັງງານຕໍ່າ ຂີ້ຫມິ້ນເປັນສານຕ້ານອະນຸມູນອິດສະຫລະອັນຊົງພະລັງທີ່ສາມາດຊ່ວຍປັບສົມດຸນລະດັບນໍ້າຕານໃນເລືອດໄດ້.

3. ມີສັບພະຄຸນເປັນຢາຕ້ານຈຸລະຊີບ: ຜູ້ຍິງສ່ວນຫລາຍໃນປັດຈຸບັນນຳຂີ້ຫມິ້ນມາພອກຫນ້າໂດຍປະສົມກັບນໍ້າເຜິ້ງ ປະຖິ້ມໄວ້ 5 ນາທີ ແລ້ວລ້າງອອກ. ເນື່ອງຈາກຂີ້ຫມິ້ນມີລິດໃນການຫລຸດການອັກເສບ ແລະ ຂ້າເຊື້ອແບັກທີເຣຍ ຈຶ່ງສາມາດນຳມາໃຊ້ຮັກສາສິວໃຫ້ຫາຍຂາດໄດ້ ບໍ່ວ່າຈະເປັນສິວສ້ຽນ ຫລື ສິວອັກເສບ.

4. ມີສັບພະຄຸນລ້າງສານພິດອອກຈາກຕັບ ແລະ ເຮັດໃຫ້ປອດມີສຸຂະພາບແຂງແຮງ ຊ່ວຍຫລຸດອາການພູມແພ້, ແກ້ອາການຫວັດຕັນດັງ ເຮັດໃຫ້ຫາຍໃຈສະດວກຂຶ້ນ.

5. ຂີ້ຫມິ້ນຍັງມີປະສິດທິພາບຊ່ວຍລ້າງຫລອດເລືອດແດງ ສົ່ງຜົນດີຕໍ່ຜູ້ທີ່ມີບັນຫາກ່ຽວກັບໄຂມັນໃນເລືອດສູງ ແລະ ຄວາມດັນເລືອດສູງ.

ນີ້ເປັນພຽງຄຸນປະໂຫຍດບາງສ່ວນຂອງຂີ້ຫມິ້ນເທົ່ານັ້ນ ຂີ້ຫມິ້ນຍັງມີຄຸນປະໂຫຍດອື່ນໆອີກຢ່າງຫລວງຫລາຍທີ່ຍັງບໍ່ທັນໄດ້ກ່າວເຖິງ. ນອກຈາກນຳມາປຸງແຕ່ງອາຫານປະເພດຕ່າງໆແລ້ວ, ຢູ່ຕ່າງປະເທດເຂົາເຈົ້ານຳຂີ້ຫມິ້ນມາເຮັດເປັນຊາດື່ມ ແລະ ໃນປັດຈຸບັນຍັງມີໃນຮູບແບບຂອງອາຫານເສີມນຳອີກດ້ວຍ. ຂໍ້ເສຍຂອງຂີ້ຫມິ້ນຢ່າງຫນຶ່ງກໍ່ຄືລະລາຍໃນນໍ້າໄດ້ຍາກ ແລະ ຮ່າງກາຍດູດຊຶມເອົາສານອາຫານໃນຂີ້ຫມິ້ນໄດ້ຍາກ ສະນັ້ນ ພິກໄທດຳຈຶ່ງເຂົ້າມາມີບົດບາດສຳຄັນ ເພາະມັນມີສານທີ່ເອີ້ນວ່າ: ໄບໂອເພີຣິນ (BioPerine®) ຊ່ວຍເຮັດໃຫ້ຮ່າງກາຍດູດຊຶມເອົາສານອາຫານຈາກຂີ້ຫມິ້ນໄດ້ຢ່າງເຕັມທີ່.

ເຮັດແກງກະຫລີ່ຢ່າລືມໃສ່ພິກໄທດຳນຳເດີ້!