ຫລີກລ້ຽງ ແລະ ປ້ອງກັນພະຍາດເລືອດຈາງທາງກຳມະພັນ Thalassemia

ພະຍາດເລືອດຈາງທຳກຳມະພັນແມ່ນຫຍັງ?

ພະຍາດເລືອດຈາງ ຫລື ພາສາອັງກິດເອີ້ນວ່າ: ທາລັສຊີເມຍ (Thalassemia) ມີສາເຫດມາຈາກກຳມະພັນ ໃນການສ້າງເຮໂມໂກລບິນຜິດປົກກະຕິທີ່ເປັນສ່ວນປະກອບສຳຄັນຂອງເມັດເລືອດແດງ. ຈຶ່ງເຮັດໃຫ້ເມັດເລືອດແດງມີອາຍຸສັ້ນ, ແຕກງ່າຍ ແລະ ຖືກທຳລາຍງ່າຍ.

ພະຍາດນີ້ເປັນພະຍາດທາງກຳມະພັນທີ່ສືບເຊື້ອມາຈາກພໍ່ ແລະ ແມ່ທີ່ເປັນພະຍາດ ຫລື ຖືເຊື້ອພະຍາດທາລັສຊີເມຍ. ເປັນໄດ້ທັງໃນຜູ້ຍິງ ແລະ ຊາຍ ສາມາດພົບໃນປະຊາກອນທົ່ວໄປ.

ລັກສະນະອາການສະແດງອອກ

ສະແດງອອກນັບຕັ້ງແຕ່ບໍ່ມີອາການໃດໆຈົນເຖິງມີອາການເລືອດຈາງຊະນິດຮ້າຍແຮງສູງທີ່ອາດເສຍຊີວິດຕັ້ງແຕ່ໃນທ້ອງ ຫລື ຫລັງເກີດບໍ່ເກີນ 1 ວັນ.

ຊະນິດຮ້າຍແຮງຫນ້ອຍຫາປານກາງ: ຜູ້ທີ່ເປັນພະຍາດຈະມີອາການຈືດ ຕ້ອງໄດ້ຮັບເລືອດເປັນບາງຄັ້ງຄາວ ຮູ້ສຶກເມື່ອຍງ່າຍ. ຊະນິດຮ້າຍແຮງຈະມີລັກສະນະທາງກາຍະພາບດັ່ງນີ້:

• ຈືດມ້ານ, ໂຫນກແກ້ມສູງ, ຜິວຫນັງກໍ່າ.
• ຫນ້າຜາກກວ້າງ, ຕາເຫລືອງ, ດັງແປ.
• ຕັບປ້າງໃຫຍ່ ອາດມີບາດແຜຊໍ້າເຮື້ອຢູ່ຕາມຂາ.
• ຮ່າງກາຍຈະເລີນເຕີບໂຕຊ້າຜິດປົກກະຕິ.

ການສືບເຊື້ອສາຍພະຍາດ

ການປິ່ນປົວ

ຜູ້ທີ່ເປັນພະຍາດທາລັສຊີເມຍເກືອບວ່າທຸກຄົນຈະມີອາການອ່ອນເພຍຍ້ອນຂາດເລືອດ. ຄົນທີ່ເປັນຊະນິດຮ້າຍແຮງຕ້ອງໄດ້ປິ່ນປົວດ້ວຍການໃສ່ເລືອດບໍລິຈາກຢ່າງເປັນປະຈຳເມື່ອມີອາການເລືອດຈາງ ປະມານ 3-4 ອາທິດ ຕໍ່ ຄັ້ງ. ນອກຈາກນີ້, ຍັງມີການປິ່ນປົວດ້ວຍວິທີອື່ນອີກ ເຊິ່ງພວກເຮົາຈະນຳມາຂຽນໃນໂອກາດຫນ້າ.

ການຄວບຄຸມ ແລະ ປ້ອງກັນ

ບຸກຄະລາກອນທາງການແພດຕ້ອງໃຫ້ຄວາມຮູ້ແກ່ປະຊາຊົນກ່ຽວກັບພະຍາດນີ້ ເພື່ອຄົັນຫາກຸ່ມສ່ຽງ ແລະ ໃຫ້ຄຳແນະນຳແກ່ຜູ້ເປັນພະຍາດໃນການຮັກສາຕົນເອງຢ່າງຖືກວິທີທີ່ໂຮງຫມໍເມືອງ ຫລື ແຂວງທີ່ຢູ່ໃກ້ບ້ານ.

ຄູ່ສົມລົດຕ້ອງມີການປຶກສາແພດຫມໍ ແລະ ກວດເລືອດ. ແພດຫມໍຕ້ອງໃຫ້ຄຳແນະນຳກ່ຽວກັບຄວາມສ່ຽງ ແລະ ການຄຸມກຳເນີດທີ່ເຫມາະສົມສຳລັບຄູ່ຜົວເມຍທີ່ກວດເລືອດພົບວ່າມີຄວາມສ່ຽງທີ່ຈະໄດ້ລູກເປັນພະຍາດທາລັສຊີເມຍ.

ພິມຫນ້ານີ້